➖ Mamlakatimizda bolalar sportini rivojlantirish, ayniqsa, qizlarni sportga keng jalb etish davlat siyosatining ustuvor yo‘nalishlaridan biriga aylangan. So‘nggi yillarda bu boradagi tizimli islohotlar o‘z samarasini bermoqda. O‘zbekistonlik yosh gimnastikachilar xalqaro musobaqalarda muvaffaqiyatli ishtirok etib, yurtimiz sha’nini munosib himoya qilmoqdalar.
⭐ Shunday iqtidorli yoshlar orasida Namangan shahridagi 6-sonli davlat maktabgacha ta’lim tashkiloti tarbiyalanuvchisi Ifora Mudodbekova, Yangi Namangan tumanidagi 60-umumta’lim maktabining 2-sinf o‘quvchisi Omina Islomjonova hamda Rayhona Ravshanovani alohida ta’kidlash joiz. Ular badiiy gimnastika sir-asrorlarini Gimnastika sport turlariga ixtisoslashtirilgan sport maktabining tajribali murabbiyi Kamila Mirxalikova rahbarligida o‘rganib kelmoqdalar.
📢Yaqinda Birlashgan Arab Amirliklarining Dubay shahrida o‘tkazilgan “GYMNASTIKA SOLO CUP JUNIOR 2025” xalqaro turnirida yurtimiz nomidan ishtirok etgan namanganlik yosh gimnastikachilar kuchli raqiblar orasida munosib chiqish qilib, faxrli 2-o‘rinni egalladilar. Ushbu nufuzli musobaqada 17 davlatdan 650 nafar ishtirokchi qatnashdi. Namanganlik qizlar nafis sport turi texnikasini mukammal egallaganliklarini ko‘rsatib, xalqaro arenalarda mamlakatimiz obro‘sini yanada yuksaltirishdi.
◀️ Bunga qadar esa yana bir iqtidorli gimnastikachi – Gimnastika sport turlariga ixtisoslashtirilgan sport maktabi tarbiyalanuvchisi Fotima Karimjonova ham Xitoyning Guanchjou shahrida bo‘lib o‘tgan “East Cup & Olympic Stars” xalqaro musobaqasida 2-o‘rinni qo‘lga kiritgan edi.
Namangan viloyati maktabgacha va maktab ta’limi boshqarmasi Axborot xizmati
