Tumanning Chodak qishlog‘ida joylashgan “Shayxon” mahallasida 150 o‘ringa mo‘ljallangan, yangi, 14-sonli davlat maktabgacha ta’lim tashkiloti foydalanishga topshirildi. Shu munosabat bilan hududdagi qamrov ko‘ratkichini qariyb 100 foizga yetkazish imkoniyati yaraldi.Ta’kidlash joizki, shu vaqtga qadar “Shayxon”da 1 ta Davlat va 4 ta Oilaviy-nodavlat maktabgacha ta’lim tashkiloti faoliyat yuritardi. Ularga 379 nafar 3-7 yoshli bola qamrab olingan bo‘lib, mahalladagi jami 554 nafar bolaning 179 nafari ta’limning dastlabki bo‘g‘inidan bebahra qolayotgan edi.Yuqoridagi omilga ko‘ra, 2022 yilgi Davlat investitsiya dasturiga yangi bog‘cha qurish masalasi kiritildi va 5 mlrd 42 mln so‘mdan ziyod mablag‘ ajratildi. Mazkur dasturiy vazifa qisqa vaqt oralig‘ida “Yangi avlod qurilish invest” MChJ bunyodkorlari tomonidan uddalanib, yangi, zamonaviy bog‘cha barpo etildi.
Bu jihatdan qaraganda mamlakatimizda keyingi besh yil oralig‘ida maktabgacha ta’lim sohasida keskin burilish hosil bo‘lganligini kuzatish mumkin. Xususan, birgina Pop tumanining o‘zida burungi 20 – 30 foizlik qamrov ko‘rsatkichi, bugungi kunga kelib, 82,7 foizga yetdi. Boshqacha aytganda, tumandagi jami 18 ming 53 nafar 3-7 yoshli bolaning 14 ming 936 nafari maktabgacha ta’limga qamrab olindi. Davom ettirilayotgan tizimli islohotlar hisobiga, yaqin yillarda bu ko‘rsatkich yanada ortishi kutilmoqda. Bu esa, odamlarni haqli shukronalikka undamoqda.“Shayxon”dagi bog‘cha ochilishi marosimi ham tom ma’nodagi bayram tusini oldi. Karnay sadolari yangradi. Odamlar yangi maskanga misoli oqib kelishdi. Ular kelajak avlod uchun yaratilgan sharoitdan, farzandlarining porloq istiqboli uchun ko‘rsatilgan g‘amxo‘rlikdan minnatdor ekanliklarini bildirishdi.An’anaga ko‘ra, nuroniylar tomonidan ramziy lenta qirqildi. Ramziy kalit esa, yangi dargoh egalariga topshirildi. Bog‘cha hovlisining kirish darvozasidan boshlangan xasham, sharqona ayvonlar, o‘yin maydonchalari, uch qavvatdan iborat binoning muhtasham salobati, ichkaridan o‘rin topgan zamonaviy oshxona, musiqa zali, o‘quv-mashg‘ulot, sanuzel, dam olish xonalari, ulardagi eng so‘ngi urfdagi jihozlar hamma-hammada juda katta ishtiboh uyg‘otdi.
Tadbirda qatnashgan, tuman hokimi A’zamjon Sultonov mahalla ahlini, shuningdek, tashkilot jamoasini va albatta, jajji tarbiyalanuvchilarni ushbu yangi maskan bilan chin samimiyat bilan tabrikladi.
Boshqarma Axborot xizmati
