So‘nggi yillarda yoshlarning ta’limga bo‘lgan qiziqishini yanada oshirish va ularni kelajak kasblari bo‘yicha bilim va tajriba bilan ta’minlash maqsadida “Yangi O‘zbekiston” universiteti professor – o‘qituvchilari mamlakatimizning turli hududlarida mahorat darslarini tashkil etish faoliyatini kengaytirmoqda. Ushbu tashabbus nafaqat zamonaviy ta’lim uslublarini joriy etishda, balki o‘g’il – qizlarning ijodiy salohiyatini rivojlantirishda ham muhim rol o‘ynaydi. Namangan shahridagi 1-ixtisoslashtirilgan maktab – internatida o‘tkazilgan tadbir doirasida oliy ta’lim dargohining iqtisodiyot kafedrasi mudiri Baxtiyor Eshchanov va kimyoviy va materialshunoslik muhandisligi kafedrasi professor – o‘qituvchisi Babaa Rachid ishtirok etdi. Jarayonda o‘quvchilar nafaqat nazariy bilimlar, balki amaliy ko‘nikmalar bilan ham tanishish imkoniyatiga ega bo‘lishdi. Tashkilotchilar ta’limning yanada interaktiv va jozibador shaklini yaratish maqsadida turli metod va texnologiyalardan foydalangan holda o‘z bilimlari bilan bo‘lishishdi. Uchrashuv davomida ishtirokchilar o‘zlarini qiziqtirgan barcha savollariga javob oldilar. Ushbu mahorat darslari va seminarlar orqali yosh avlod zamonaviy texnologiyalar, iqtisodiy nazariya va ilm-fan sohalaridagi yangi yutuqlar bilan tanishib, o‘z salohiyatlarini kashf etishlari, shuningdek, kelajakdagi kasbiy yo‘nalishlarini aniq belgilashlariga xizmat qiladi.
Namangan viloyati maktabgacha va maktab ta’limi boshqarmasi Axborot xizmati
